Archive for category Linguistics

Te reo ake o Ngāti Porou: Wānanga reo Māori – Wai Whakaata.

wai-whakaata

Tā Tāmati Reedy e whakamārama nei me pēhea e whakakore ana i nga rerenga kōrero ki te hui i roto i ngā rā okioki kua pahure ake nei.

He āhuareka tā mātou hui i ngā rā whakataa kua hipa ake i tū ai ki Tahawai Marae, Pakuranga, Tāmaki Makaurau 2016. Huihui mai nga whānau, hapū o  Te Tairāwhiti kia wānangahia ai ngā take, kaupapa o te iwi, arā, te reo, mōteatea, waiata, pūtea tautoko te mea, te mea. Nā Te Taurahere o Ngāti Porou ki Poneke i whakariterite tēnei hui he mea whakahaere e Tā Tāmati Reedy mā kei te haere wīwī wāwā rātou huri noa Aotearoa e tautoko ake nei i te hunga o Nāti Wīwī kua marara atu rā ki ngā tai e whā o te motu. Parahutihuti ana ā rātau mahi tautoko whakariterite i tēnei kaupapa ko te tiaki tangata, manaaki tangata. Mō konei rā e hika mā kia pai tō haere tawhio noa atu i runga i te mata o te whenua katoa. He pai ki a au te kōrero a Tāmati mō te reo Māori i  karangatia nei e ia ko Te Wai Whakaata: Reflecting on our reo. I aro atu ai ia ki nga āhuatanga o te reo ake o Ngāti Porou, ki te takenga mai o te reo, te whakahuatanga o te reo, he tautuhi i ētahi atu āhuatanga o te reo, te ringikuihi, wetewete reo, te whakapapa o te reo me te matapaki reo Māori. Hei tāna kore ētahi kupu o te iwi e rangona i ēnei wā pēnei nā i ‘mārohirohi=kaha’. Ki a ia anō, kaua e whakatohutō mai i te kupu ‘nga (ngā)’, ā, mā te kōrero i te reo Māori e ora ai te reo. Āe, pono mārika. Miharo kē ana. Ko ngā mōteatea, waiata o te wākainga, te whakamaramatanga o ngā kupu o aua waiata, waiata a ringa he waka anō hei whakaora ake i te reo. He tino manu tioriori te kui nāna i whakaako mai ēnei mea ki a tātou. Ko te amorangi ki mua, ko te hāpai ki muri, ā, ka pai ki muri, ka pai ki mua. Tātau katoa mā te tini ka taea. Reka ngā kai, pai te hui. Ka waiho i konei tā Tāmati kōrero i mea nei “ko te hiringa i te mahara = the power of the mind”, he mea tino whai tikanga, he tino āhuatanga o te tangata, kia tiakina, kia whakatupungia mai, kia ora ai te tangata. Me pēnei ngā Taurahere kaupapa whakahaere o ngā āhuatanga o Ngāti Porou me Hikurangi maunga he mea tū tonu mai rā hei whakaruruhau mō te iwi, me Waiapu awa he tiaki i te iwi.

Leave a comment